睇完阿婆後感 (6月14日)

今晚睇完細阿婆, 我諗佢嘅情況真係唔係咁樂觀, 今晚去到, 佢坐係度訓咗, 見到耳仔應該有留過血(有血跡), 我阿媽輕輕拍佢, 佢醒咗一醒, 望一望我阿媽, 又再合咗眼, 而我第一眼見佢個樣就覺得佢好憔悴, 就係同一時間, 醫護人員要張細阿婆放回床上, 等咗大約十五分鐘, 再次走入病房, 今次見細阿婆巳經係床, 媽媽再次輕輕嘅拍佢, 拍咗好一陣, 佢都冇醒, 所以我亦叫媽媽唔好再拍佢, 跟住打算叫媽媽打俾舅母, 問一問阿婆今日嘅情形, 答案都係同我地差唔多, 一路訓, 拍佢就望一望人, 然後再合眼, 而唯一唔同嘅, 就係佢今日食野食多咗好多野, 對於我黎講, 我就覺得唔係一件好事, 因為, 我覺得佢可能個腦巳經冇咗signal乜野係飽, 而佢今日嘅情形, 阿媽話巳經同前兩日差好遠, 係差咗好多, 唔係好識認人.

今日朝早返工時, 打電話返屋企問阿媽可唔可以今晚同我一齊去, 因為我怕阿婆唔認得我, 同阿媽又要每日都要好長途幫我阿哥照顧佢個女(15:00 - 20:00), 所以叫我星期六先去, 但其實我唔知道阿婆可以係度幾耐, 所以真係要今晚去睇睇先, 最後唯有叫阿媽帶我阿哥個女去我屋企, 等我阿爸睇住, 然後同我去.

睇完阿婆, 個腦不斷諗,人真係好化學, 好容易就冇咗, 係返屋企嘅路途上, 不斷諗起細阿婆新年時去探佢健健康康個樣....
. 佢每年都會同我講同一番說話, 我每年都用model answer答佢, 佢呢幾年都問我相同嘅問題, 我呢幾年都唔正面答佢, 本來下年可以答佢, 不過真係唔知有冇咁嘅機會, 我亦諗起佢同今年新年同我講嘅最後一段說話, 今希望唔係最後一段....., 而當日我地走時, 佢亦都忍唔住......而且亦都開始擔心阿爸, 七十幾歲, 都好健康, 日日打波, 呢幾日落雨, 冇人同佢打badminton (室外), 就自己打籃球, 但係落雨喎!!! 都真係好驚佢跌親...同阿媽講完, 阿媽又話佢唔聽, 頭先返黎同佢再講, 都係咁, 重同我講話自己唔會走架, 唔通你想阿爸唔打得波咩, 真係俾佢吹脹!!!

0 comments: