香港最想去的十個地方(下)

第五位 - 大澳
呢兩三年都無去過大澳,前幾年因為大雨破壞得幾嚴重,而家唔知變成點?見到人去大澳會去排過雞蛋仔黎食,不過雞蛋仔同大澳幾時同點解會扯上咗關係呢?真係好令我費解!反而以前出名嘅豆腐花唔知重係唔係度,至於高腳屋、彈途魚我相信應該都重係度生活僅嘅。另外,前一排又話大澳個舊警署會變做精品酒店,但要$2000一晚,真係搵鬼(佬)住。重有就係由東涌入去大澳,要坐成個鐘頭巴士先到(未計去東涌嘅時間),就真係要計清楚時間同睇清楚班次先好,重有就係要好早出門口。

第四位 - 糧船灣
糧船灣係邊?就係萬宜水庫東壩隔離,套「殺人犯」都係附近取景,望出去會見到破邊洲,係條壩到望落去又會見到好多「啞呤」,不過其實我都未正式去過,只係路過幾次。而家果度係香港地質公園嘅一部份,所以都想去睇下,不過入去一係要行三個鐘(出黎又三個鐘),一係就叫的士車入去,不過我記得唔係個個位都收到香港signal。

第三位 - 魔星嶺
正確黎講係魔星嶺道先真,以前見人影日落非常之正,不過果度人又少,又有墳場,完全係挑戰膽量大測試;如果入晚時份,係果度影相應該重要挑戰你身體有幾多血,影完可能俾d蚊吸乾哂血。我重好記得上年夏天,搭小巴去瑪麗見到個景,超靚!

第二位 - 西營盤
前幾日坐車經過,基本上個景同魔星嶺道見到嘅差唔多,不過,一個「高抄」,一個「低抄」,如果要係果度影相好有難度,因為都唔知去邊個位影,d靚位係唔可以停留嘅地方,因為可能係行車天橋嘅上邊。

第一位 - 大帽山日出
呢個第一位,真係好有難度,又要早起身,又要有車,你叫的士上去,司機怕你擋佢死牛,又或者怕你會白花油王子上身。今年一月一日好想上去,不過,結果係冇上到,因為落雨,就係咁就冇咗2010年第一個晨光。

其實,寫咗十個地方,都好似圍繞住影相,不過唔影相去睇下,都唔錯嘅,唔知由而家開始,有幾多個地方可以去得成呢?

8 comments:

naruto said...

2同3咪即係我果度,使唔使帶路?

係未去過1咋喎我

卡臣 said...

鳳皇山也是一個選擇啊

l.minor said...

naruto:
原來你係地膽?其實果兩段路有冇d焦咁恐怖,又高高地嘅地方呢?又可以睇到日落?等你介紹下d地方好喎!

卡臣:
嘩~~你呢個提議幾好喎!完全忘記咗!不過,呢個要行夜山,要叫多d人去先好喎,如果唔係見到II都唔知點算!?

naruto said...

魔星嶺我介紹過,幾個月前上去影唔到日落啦,因前面嘅樹生得太高

西營盤我唔知你講邊忽

如果係想影日落,我推介大口環,數碼港,仲有早幾日我去嘅。。。魔星嶺腳嘅日落觀瀾亭,上次早到左,又太多蚊,未影就走佬啦;有興趣可以一齊去影

l.minor said...

naruto:
我再睇番你個blog,原來睇漏好多野,你又有去大澳,摩星嶺呀~~

其實西營盤(定西環)果忽,應該影唔到,果度係條高速公路嘅行車天橋,上星期坐朋友車經過,咁arm又有magic,再加條昂船洲大橋(係咪叫昂船洲大橋呢?),十個靚囉!!!

搵次跟你去影相學下野都好呀!我其實都係一個影相初哥...再睇你d相,真係好正!!!其實你係用咩機影呢?GF1?我見你有提過

naruto said...

今年嘅咪GF1,之前用LX1

你自已D相都靚啦,學乜鬼野吖

如果想影我果頭嘅,夾時間去囉

kateyip said...

快 d 去影多d相呀~~ 我會等無咁熱,揾個時間去影.. ^^

l.minor said...

kateyip:

等多個禮拜,會去計劃下先