快遊沙頭角


上星期六由於我誤信天氣報告話陰天有雨,結果明明短週都係屋企做「宅男」,到兩點鐘發覺唔多對路,一定要出去行下,結果就好快決定去沙頭角行下。
粉嶺火車站隔離搭78K

由屋企出發,經過咗小巴->火車->巴士,用咗太約個半鐘去到沙頭角,原來沙頭角都唔係咁荒蕪,重以為好鄉村,原來成個公共屋村係度,又有惠康,重鬼咁大過休憩公園。
休憩公園
惠康同公共屋村

行下行下見到有個非常簡陋嘅關口,我估就係中英街,當我企係度望下個關口寫乜時,同一時間我都俾一位英俊瀟灑、氣宇軒昂的警察「打量」著,就係咁我就順勢行過去,扮傻的問道:「請問係咪呢張「禁區紙」就可以過去呀?」佢嘅回覆就粗聲粗氣:「唔係吓!要睇下邊張呀!」(我個心諗,阿Sir唔係玩野呀!我入到黎呢度,你當你d伙記死架!唔係我點入黎呀!我見你望住我,所以先扮傻問你之喎!?)
中英街
中英街隔離嘅一個建築物

最後我都過咗去對面,其實對面巳經係大陸,就係咁我就返咗大陸!不過影咗幾張相,行咗幾分鐘,發覺完全無野行,成個市集咁,所以都係返番「香港」先!


個市集,完全無野睇
呢塊野都幾靚
東和墟市

藍色果度就係過關嘅地方
 返咗「香港」,就繼續向前行,見個有個新式街市,重鬼咁大,不過人影都無隻!原來沙頭角都無咩料到!人又無!景又無!

再行下就去咗海傍,雖然天色陰陰,不過就咁係海傍行下都幾舒服,而右手邊就係沙頭角碼頭。
左手邊果度就係碼頭

呢個沙頭角碼頭都幾特別,俾起西貢碼頭長一倍有多,中間又有d位有得坐,又有得洗手,見到d阿婆圍著一齊坐,有d坐櫈,有d坐地下,都幾過引。碼頭重有人係到釣魚、傾偈;
阿婆圍著一齊坐,望海,傾偈
你估同地同我地市區人嘅話題有冇唔同呢?以下就係我聽到嘅其中一部份:

伯伯 1:「你估重見唔見到呀?」
伯伯 2 :「!@#$...32000就唔得啦!21000都唔知上唔上到!唔跌先算@$%#$%....」

原先以為呢度係「與世無爭」之地,但原來佢地都跟得出面好貼喎!

係碼頭望下人釣魚,偷聽下人講野,就係咁打發下時間,同一時間,我隔離位大叔之魚扞突然強烈彎曲...
釣魚的阿叔
 
見唔見到阿叔嘅眼神?幾有盼望!心底裡發出 - YES!!!
原來釣上一條手板size的黃腳立
沙頭角的年輕人

阿伯回家,佢incept我都要回家了
係碼頭附近見有人熱身,跟住你估佢地做乜?
嘩?游水返大陸?
發覺游錯方向,又游番轉頭,可能怕解放軍放魚雷射佢

雖然天色唔算好靚,不過點都要影下
黃昏嘅倒影
沙頭角內灣的停泊處
有架船啱啱返黎
呢張碌哂地影
呢張用燈打過去,都幾靚
呢張冒著俾數百隻「水上小強」襲擊影嘅
成地都係花 

15 comments:

naruto said...

我鍾意阿伯個yes

kateyip said...

魚眼好令呀 !!!!!!

l.minor said...

naruto:
阿伯好野呀!交足戲俾我呀!不過佢一路都冇望過我一眼囉!

kateyip:
魚眼好玩呀!最近帶親機出去,都一定帶佢係身,不過帶親佢出去,都好怕整親佢(整花佢)...

Maisy said...

你響邊度搵張禁區紙出黎?
呢個地方真係未去過,之前上網搵過資料,好似都係同購物有關,間唔中有些香港團都去沙頭角的。

l.minor said...

Maisy:
因我的外婆是住在禁區內的地方,所以申請了禁區紙可出入去探她,但那個地方其實不是沙頭角,而是叫蓮麻坑,以前港台曾經有電視節目介紹過。而那張禁區紙又分兩隻,一隻係可以去沙頭角同蓮麻坑兩個地方,而另一隻只可去蓮麻坑一個地方,唔可以去沙頭角,而我是前者。另外,靠知就算是可以去兩個地方的禁區紙又分兩種,一是原居民,另一種是探親性質的,我就是後者。所以那些禁區紙是非常多組合,我也攪不清楚。另外,據稱沙頭角有部份魚排,可以代辦禁區紙,方便那些釣魚人入去佢地魚排釣魚,而每張代收費數十元(但我記憶申請禁區紙是免費的)。

至於沙頭角其實都冇咩野行,不過都當係去睇過咁,聽阿媽講,好多人朝早去沙頭角飲茶,買餸,如果下午先去,當然無野睇...

另外,之前聽到政府打算取消禁區,開放俾市民去遊玩,不過唔知而家傾重點

卡臣 said...

沙頭角村長個女
有無遇見到呀?

l.minor said...

卡臣:
冇呀!不過見到佢個孫女..."李應愛"

Maisy said...

原來早有準備擇定禁區紙:p

呢d地方平常人真係無乜機會去,謝謝分享呀:)

Him said...

會唔會大陸更多地方行同靚o的﹖因為通常都係大陸繁盛過「香港」。

紫熊 said...

部份相片效果很特別, 是什麼鏡頭呢?

如果游海水的話, 就只能在沙頭角那邊吧?如在維港, 可能游一兩步便被垃圾纏住.....

l.minor said...

Maisy:
:)

Him:
大陸那邊就咁睇都係市集為主,而且我沒有行得太入,始終那邊是大陸,而且那日我是單人匹馬,怕消失咗也沒有知。

紫熊:
有些是魚眼鏡影出來的,所以妳會見到有些相是變了形,而且影到的範圍很廣。另外,其實沙頭角的海水雖沒有眼見的垃圾,但水是「黃金金」的。

maymay said...

相片好靚!
花花係夾竹桃?

l.minor said...

MayMay:
Thanks!

幣!我都冇留意d花係咪夾竹桃潻(不過,應該唔係,因為棵機比較高)!我重走去整過佢黎,下次都係留意下先。

budsbenny PartyBuddy said...

Hello, 您相好令...可以將佢地做我地餐廳佈置嗎??

l.minor said...

budsbenny PartyBuddy:

你好~你想要那張相嗎?