果欄夜遊

我同朋友講去咗果欄買生果,大家都很驚奇,異口同聲問我:「唔雜咩?」

雖然我覺得佢地d樣都幾兇惡,手臀隻紋身由膊頭紋到手指,再由手指紋到腳指咁長!不過其實佢地都幾有禮貌,重好用心同你講解!重要一句粗口都冇講過!

我地初時都係係外圍睇下邊間有日本水晶梨,就問下價錢;跟住行下行下就直入咗果欄心臟,跟住見到我地想買嘅日本水晶梨,細問之下原來我地見到果d唔係水晶梨,係日本X梨(唔係操口,唔記得咗叫乜野梨),佢亦好老實不客氣話而家日本水晶梨,唔底食呀!Yen貴,來貨貴!不過由於水晶梨係轉送家人,所以一定要搵,而那位人兄居然帶我地去另一間鋪,入巨型雪櫃幫我地搵,雖然搵唔到最大個的水晶梨(最大的水晶梨係一箱24個,而價錢與32個的差二百蚊),而最後我地買咗28個裝。
拎到手軟的水晶梨
二十世紀原來即是水晶梨的意思
鳥取之梨,個名幾勁呀!(我初時以為鳥取係”鳥都取之梨”的意思,原來鳥取係日本出名出產水晶梨嘅地方)
 
28個裝的
幾咁肥大

買完後,佢再帶我地去睇其他生果,有隻叫綠寶石,其實是布林來的,佢大力推介;重有一種叫釋加嘅生果,知唔知係咩黎呢?重有特別叫我地去睇嘅巨鋒提子,我一睇,嘩!好靚!好新鮮!不過由於提子易壞,而一箱有十小盒,所以放棄了(之前一日有朋友去買巨鋒提子,夜晚12點就賣哂了)。

後記:雖然果欄我都入去影過相,不過係日頭黎,無人架!另外,去果欄買生果唔係特別平,特別我地呢d生客去買,買一箱、兩箱,對佢地黎講都好小數目,不過就新鮮囉!平小小囉!最後就要多謝果位介紹生果俾我地果位人兄 - 志哥,鬼咁百厭,不斷帶我地去其他鋪頭攪攪震,識多咗d生果!

16 comments:

Coffee n Tea said...

你這篇入果欄買生果真令人識多咗嘢,好有趣!想八卦下,你買果箱日本水晶梨幾$$呀?

l.minor said...

Coffee:
買咗$800啊!$28-$29一個到啦!琴晚試咗一個,見佢d皮好似好青(未熟哂),不過食落都幾甜。如果有時間,可以搵日朝早去睇(星期日都會開,中秋就唔好去,因為佢地假期),我果晚去係夜晚十一、十二點,因為貪佢地一落貨即買,新鮮d。另外今朝返工行過睇,好熱鬧,好多生果睇。

naruto said...

釋加。。。。番鬼佬荔枝,綠色果隻吖嘛

l.minor said...

naruto:
我只可以講句,俾十個勁你!

平時我只知果d叫番鬼佬荔枝,果位志哥呢,係咁同我講d釋加正呀!又甜又咩!跟手開箱俾我睇個箱入邊d釋加,個個鬼咁大個,不過你見佢個樣,以為自己去緊買手留彈做世界!

Ebenezer said...

你買咁多梨,要嚟做節?

除咗去果欄,仲有冇去埋隔離間戲院重拾吓回憶咁呢?

naruto said...

學下D阿伯先。。。我食鹽多過你食米啦,𡃁仔

其實係台灣見過釋加雪糕,所以知

Ellen老師 said...

夜晚又去,朝早返工又去,你住好近呀?

l.minor said...

Eben:
係呀!因為做節,所以買黎送俾親戚食呀!另外,留咗幾個俾自己食。

至於戲院呢...哈哈...你講邊間先?如果油X地就大修咗幾年,都重係大修緊...哈哈...百老匯就間唔使都有去

naruto:
一聽釋加,我只知道釋加牟尼,善哉!善哉!

Ellen老師:
其實今次夜晚去係突登去買時節水果;朝早行過係路經,果欄呢度係我返工必經之路囉~~

平帆 said...

好耐都無見過「鳥取」的生果箱,因為生果檔的吉箱一出現,就會立刻被人取走!

naruto said...

喂,就係似釋加牟尼個髮型先叫釋加喎,你唔係而家都唔明吖?

油麻地戲院,你應該都留低唔少腳毛啦

l.minor said...

平帆:
原本我誤會咗「鳥取」係雀仔都會黎取嘅意思,真係笑死人,好在上網搵搵,原來係日本嘅地方黎。

「鳥取」唔指生果多人買,連生果箱都多人攞?哈哈

l.minor said...

naruto:
我轉數慢無辦法,多謝師主打通咗我嘅任篤二脈,善哉~

至於油麻地戲院呢...正喎,你又咁識貨去油麻地戲院睇戲?果然一齊留低唔小腳毛呀!

naruto said...

你真係儍儍地,我香港人嚟架,當年睇呢D戲點會過海呀

l.minor said...

naruto:
嘿嘿...就係咁先要過九龍睇,怕撞到熟人...

你而家先係香港人,你之前好似係香港嘅大西北...

Kin Yan said...

好有旅行feel! 我覺得同local人行market很好玩!
聖誕有韓國朋友來香港,晚上逛果欄好像也不錯

l.minor said...

Kin Yan:
那要夜一點去(around十二點),太早去無野睇的