台灣之行

一路巳來,我嘅抽獎命係零,每次有實質性嘅獎品都會與我刷身而過(抽中無無謂謂果d就大把),從無抽中過,而公司十一月尾攪旅行,今次破天荒飛出香港(上年去長隆,員工免費,不過我無興趣,所以無去),送一日假再加機票住宿再送保險,導遊小費全包宴嘅三日兩夜台北旅行,公司亦歡迎員工直系家屬參加,而公司又會有十個quota金錢資助俾員工直屬家屬,所以參加嘅員工反應熱烈,而且人數遠超預期,所以攪到要抽籤,但居然今次我抽中咗,今次真係轉運呀!

計下數,十一月尾台灣之行巳經係第七次去台灣,不過都仍然唔係好熟呢個寶島,地方太大之餘,玩嘅地方多而且又好唔同,南有南玩,北又北玩,而家又開始有台東行潻。諗番第一次去台灣原來巳經係上世紀嘅事,當年畢業出黎做野,同學話去台灣環島14日,結果4人成行,諗番起四個當中,我同其餘三個都算熟,但另外攪手就同另外兩位同學唔算太熟,都唔記得點解最後會成到團。
第一次台灣行 - 1996年畢業行(墾丁)

第二次係2002年,都巳經係九年前嘅事,而第三次係相隔第二次6年,即2008年,相隔幾次台灣真係變咗好多,而前覺得d人好土,特別係男仔,不過而家巳經唔同哂,幾多香港女性,見到台劇的吳尊,阮天經就暈了...不過,無變嘅係台灣嘅人情味~~重有我嘅超爛普通話~~
第二次台灣行 - 2002年(淡水)
第三次台灣行 - 2008年台灣的地道小菜(台北市)

2009年初同屋企人又去咗一次台灣(父親大人同母親大人第一次到台灣,我對上一次同佢地出門,如果唔計返鄉下,應該係小學去澳門),到2009年中,收到台灣的酒店package覺得好吸引,所以又去咗第五次台灣旅行;到今年七月去咗高雄墾丁休息咗四日,墾丁高雄同台北嘅感覺又好唔同, 直到今次將會第七次去,不過熱情仍然不減。
第四次台灣行 - 2009年一家人遊行(宜蘭老爺大飯店)
第五次台灣行 - 2009年台灣酒店送上的咖啡(春秋烏來)
第六次台灣行 - 墾丁代步的電單車

今次旅行攪得成,其實都要多謝公司嘅幾位同事攪手,因為都知道佢地同大老闆多番周旋,先可以攪得成,因為呢個旅行臨公報前,差d脫腳,由去台灣變咗返大陸坐高鐵,真係希望佢地攪完旅行唔好俾人...(講笑啦!點會)

14 comments:

largeheadboy said...

我第一次去台灣都係十幾年前嘅環島遊
十一月天氣好,係旅行嘅好日子呀!
我都想飛一轉呀!

Coffee n Tea said...

我一見到你呢篇的題目,心想,又去台灣!minor可能係台灣人都唔定!:)

卡臣 said...

我第一次去台灣...1992年

祝你好運繼續來

supageti said...

哇!Lucky 喲!:)

naruto said...

原來去左旅行咁爽

ps:中開就中架啦,我話嘅

Ebenezer said...

你間公司嘅福利真今人羨慕:)

l.minor said...

largeheadboy:
飛啦!又可以休息一下refresh下!

l.minor said...

Coffee:
haha...我有朋友同你一樣講法!你台灣黎架!又番去?

l.minor said...

卡臣:
多謝!收哂冇回頭!

當年你去台灣有冇艷遇?

l.minor said...

supageti:
真係第一次,希望繼續有啦!:P

l.minor said...

naruto:
未去呀!今個月尾先去呀!承你貴言呀!

l.minor said...

Ebenezer:
其實都真係唔錯,不過好多時人都鍾意厭三厭四,我都係其中一份子,攪到成日俾人鬧!話我身在福中不知福!

平帆 said...

我兩次去台灣都是這五年的事。

去過台灣,才知香港人是多麽的小家子氣,上電梯不靠邊站,捷運車廂裡沒有人大聲講電話...

l.minor said...

平帆:
非常認同!重有坐地鐵時,列車一到,想先讓人出咗先,點知隔離左右嘅人蜂擁而入,攪到出來個人撞過來!