新加坡2012 - 前言

年廿七出發去新加坡,超多人

一向以為香港同新加坡距離好近,但機程原來要三個鐘零四十分鐘。三個鐘可以係機上睇一套戲,可以食一餐飯,或者再重溫一次行程,執下漏,諗下應變計劃。


落機時間係下午兩點零鐘,天色陰陰;攞行李出閘之後,就先去遊客中心(出閘轉右就見到),攞咗幾份地圖及遊客資料,跟住就開始由機場坐的士去聖淘沙所住嘅酒店。
到步後見到烏雲密佈的樟宜機場

新加坡坐的士,同香港價錢差唔多,不過新加坡的士唔同時段,就有唔同嘅附加費,感覺有d複雜,有興趣可以睇下呢度。另外,去唔同地區,又有其他附加費,好似如果你係機場坐出去市區,就要俾多$3坡幣(大約HK$18),入聖淘沙,就要俾入島費,的士入去就多收$5坡幣(大約HK$30)。
其中一款新加坡的士裡邊

新加坡其實有好多華人,亦好多人識聽同講廣東話,就好似機場載我地去酒店位的士大佬,初時同佢講英文,唔應我地就開車,去到中途就突破用廣東話問我地間酒店個名(佢唔係唔識去,不過想confirm間酒店),原來佢本身係馬來西亞人,就過咗去新加坡渣的士,所以係當地講野要小心,好多人會識聽(唔好諗住用廣東話鬧人)。

由機場到酒店只要三十分鐘,我地就經歷咗陰天、行雷、落大雨到無雨,去到酒店就啱啱好停哂雨。其實之前訂酒店時,都無特別睇過,只知想住聖淘沙入邊,上網搵下聖淘沙邊間comment好d,邊間早餐好食,最後攪咗一大餐,想住個間原來係我地去嘅時間又無得book,咁就是但搵間貴多小小就算,費事煩,無時間再慢慢搵料,如果唔係房都無。
到酒店途中非常大雨

但當時我無諗過住聖淘沙去其他地方會唔會唔方便?另外更無想過入聖淘沙島係要收錢(其實證明你係住客,佢地係唔洗收錢),都係出發前一日先睇到入島要收錢,,如果咁咪好麻煩?交通費咪貴咗好多?出發前幾日再上網搵間酒店資料唔係太多人講,不過so far comment都唔錯,上去酒店個official site睇下間房資料但搵來搵去都搵唔到,酒店最平嘅房間叫deluxe,但我地張voucher寫係superior,即係點?未去攪到有d驚,都唔知訂咗乜房?
165米高的Singapore Flyer(新加坡摩天觀景輪)

12 comments:

largeheadboy said...

聖淘沙係咪都有 mrt 架?

Ebenezer said...

superior 係比 deluxe 好d d 咁多多囉。

naruto said...

聖淘沙係咪沙灘嚟架?

ayclui said...

n 年前一支公去聖淘沙 training, 好過癮...果時邊有咁多新o野玩...

平帆 said...

機場到酒店要三十分鐘?還以為新加坡很細。

l.minor said...

largeheadboy:
有架Sentosa express由Harbourfront去入聖淘沙,不過我都無坐過,一程巳經要HK$18

l.minor said...

Ebenezer:
其實到最後我都唔知係邊隻房,總知佢地official site就無list出黎,不過係另外一d訂酒店website見到有果隻房,應該係最平果隻

l.minor said...

naruto:
聖淘沙其實係個島,入邊好似有三個沙灘,你當佢係一d遊樂區咁啦~

l.minor said...

ayclui:
咁正!?唔知當時係點呢?而家我覺得幾特別,幾好玩呀!

l.minor said...

平帆:
差唔多啦,有段時間慢車,因為大雨,前邊又有交通意外,入咗聖淘沙又兜咗陣。

laulong said...

kekee, 負心劉郎想去新加坡負心吓,有冇窿路 ^^

l.minor said...

校長:
哈哈~知你係玩得之人~

睇報紙呢段時間(10/2 - 29/2)去好平$800/$900來回新加坡(新航),可惜呢段時間你行唔開呢~