的士不快經歷

前兩日公司OT到頭昏腦脹,放工巳經諗住速速回家休息,所以打算打的回去,一落公司樓下就俾人截走咗架的士,越等越唔對頭,因為架架有客,而馬路對面就架架都無客,幾經辛苦走到對面馬路,一截車,司機就問去邊,得到答案:「唔好意思,唔過海呀!」的士即時絕塵而去,腦裡巳經浮現以前種種坐的士不快事,同一時間巳在盤算,下架的士如果得到相同答案,應該點樣應付。



到截到第二架的士,二話不說走入車箱,放低個袋,然後:「唔該旺角!」

司機回答同出一轍:「唔好意思,唔過海呀!約咗人呀!」的士即時彈開車門。

巳經好唔高興:「唔得喎,我要過海!唔去就去差館啦!」

司機:「真係唔得呀,我係香港車,唔過海架!其實好近就有過海的士站,你過去果邊坐啦!」

我仍然好強硬答:「兩個地方,一係旺角,一係差館,你自己諗!」我無再出聲。

司機:「你即係為難我姐!...你去邊呀?」

我好唔耐煩:「旺角呀!我等咗幾架,架架都話唔去,算點呀!去近d又黑我面,遠又話唔去,咁即係點呀...」

其實上車不久我巳經態度有些小軟化,發覺有點欺人太甚!

我:「過海的士站有幾近呀?」

司機:「...其實過海的士站真係好近,係果度...」

司機:「一係咁啦,費時大家唔開心,我車你過去,真係唔收你錢啦!」

架的士停咗個燈位,跟住轉咗兩個彎。

 司機:「嗱!呢度咪係囉!」


我好唔高興,因為等咗好耐車,加上俾人截咗架車,再加上架架車都唔肯去,而且回憶起之前坐的士種種不快經驗,所以就搵佢黎發洩;另一方面,我好唔滿意佢地做野手法,去近嘅地方就黑面,咀裡更會發出好多不滿嘅坐語詞(唉/Jip/Jap);遠小小就唔去,又或者叫我去過海的士站坐,算點呀?咩野態度呀?呢架係的士,唔係巴士,點解要去個站坐?你咁鍾意停站,去渣巴士啦!話我為難佢?你唔過海我硬要你過海?但我要返屋企,你又唔俾我返,你又咪一樣為難我!?



19 comments:

平帆 said...

有啲人係唔駛同佢客氣的。

Him Cheng said...

大家都在搵食。

Him Cheng said...

不過,我覺得你冇問題,不會欺人太甚,始終比人感覺錢賺到太盡。佢咁渣法咪更可能冇錢賺,佢咁有信心下一秒係過海嘅。

naruto said...

我而家如非必要都唔搭

上次試過仲賤。。。一上車,講話去上環(都要跳錶架),佢係咁咳,(未講上環唔咳)好多痰果隻,想開近我隻窗,佢話壞架喎,我開盡另一邊果隻囉

largeheadboy said...

唔講話九龍的同香港的,點解依家仲要分新界的同九龍的~

l.minor said...

平帆:
當日都為呢件事憤憤不平

l.minor said...

Him:
其實我相信係佢地行內不成文規定,不過我地d外行人真係唔知道

l.minor said...

naruto:
我都唔多搭,果日太累,想早d返去,結果重慢過自己搭地鐵

l.minor said...

largeheadboy:
我估新界地大,如果唔分,可能的士邊緣化

Cat said...

試過有一段時間朝早會搭的士去尖沙咀,都要成30蚊,但係十次有五六次都聽到司機He He 唉唉咁,有D就急殺車。我都唔明點解,仲有時1-2蚊想唔找錢添。

l.minor said...

Cat:
係呀!我都唔記得咗講佢地急停殺車即招獨門秘技

TY said...

我都唔明佢地究竟想點...短程黑面, 長D又話唔過海, 究竟佢地要搵D咩客??!!!

我有次同阿臣係大潭出返灣仔, 都比個的士司機黑面呀..又要急停殺車, 差D整到肥臣呀!!!激到我死呀!!!!

1ondoncalling said...

老虎唔發威都卑人當病貓啦!
真係要發下嬲,家姐唔好搞嘅。

我Sheffield holiday返嚟咯。
聽日過嚟睇相片。

l.minor said...

TY:
大潭出灣仔都咁樣,真係唔知佢地想點

最好可能係個的士站點對點,個個自走機場

l.minor said...

London Caller:

又去渡假,羨慕死人咩~

新鮮人 said...

以前好景時仲賤,
試過係尖果和三個朋友尋的士,
三個各有目的地,
大埔、荃灣、觀塘,
但係截咗四五架都話唔去,
真係火都黎埋,
三個地方都唔啱佢哋口味,
你話係咪吋到爆吖?

依家經濟唔好,
就少見咗拒截,
過海就難講啲,
因為有過海的士站,
所以啲的士佬咪咁分囉,
至好分埋九龍、港島的,
咁咪唔洗煩囉!

l.minor said...

新鮮人:

又係喎,分咗佢,唔好煩呀~
阻人之餘,又阻住自己

1ondoncalling said...

》用London去要幾耐呢? 玩咗幾多日呀?

我去2日。Sheffield其實好細,1日就夠咯。

》係Sheffield 嘅人係咪俾London果邊悠閒d架呢?

哈哈,Sheffield果邊冇人!!
都唔知去左邊?!

l.minor said...

London Caller:
唔係吖馬?無人?